Таласта АЗС өрттөндү (жаңыртылган)

“Аймак-news”, 21-август, Талас. «Сардалбек» АЗСде өрт чыгып, 2 автоунаа күйүп кетти.
19-августта түштөн кийин Талас шаарынын Ч. Айтматов көчөсүндө жайгашкан «Сардалбек» АЗСнин күйүүчү май сактоочу цистерналары өрттөнүп кетти.
Талас райондук мамлекеттик өрткө каршы кызматынын башчысы Рустам Чулуев “Адамдардан жабыркагандар жок. Күйүүчү май ташуучу ГАЗ 53 жана “Форд транзит” маркасындагы микроавтобус цистерналарга бензин куйуп жаткан маалда өрт чыгып, экөөсү тең күйүп кеткен”, - деп айтты. Өрт чыгуунун себеби катары электронасостон чыккан учкунлун болушу болжолдонуп жатат.
Кошумчалай кетүүчү нерсе, өрт 3 саатка созулуп, 4 өрт өчүрүүчү автоунаа колдонулган. (Сыргак Раимканов)

Ак-Талаада кайрымдуулук жумалыгы өтүүдө

“Аймак-news”, 18-август, Нарын. Ак-Талаа районунда социалдык коргоого муктаж балдарды мектепке даярдоого жардам берүү жумалыгы жүрүүдө.

Ак-Талаа районунун аймагында багуудан ажыраган 34 жана турмуш шарты начар, социалдык коргоого муктаж 430 окуучунун мектепке даярдоо максатында кайрымдуулук жумалыгы жүрүүдө. Ал 10 августта башталып, 25 августта аяктамакчы.

Мындай демилге Ак-Талаа райондук ички иштер башкармалыгы тарабынан көтөрүлүп, аны райондун аймагындагы бардык айыл округ башчылары, айылдык кенештин депутаттары колдоого алууда. Аталган иш чарага түзүлгөн комиссиянын төрагасы Болот Чокморовдун айтымына караганда, бул аз камсыз болгон үй-бүлөлөрдүн балдары мектепке барбай калуу коркунучун алдын алат дейт. (Барчын Мамытбекова)

Таласта футбол боюнча турнирдин жеңүүчүлөрү аныкталды

“Аймак-news“, 18-август, Талас. Таласта А.Сакебаевдин элесине арналган 6-эл аралык турнирди «Абдыш-Ата» командасы жеңип алды.

Аталган турнир 1994-1995-жылдардагы өспүрүмдөр арасында болуп, Орусия, Казакстан жана Кыргызстандын 9 командасы таймашкан. Э. Кутманалиев атындагы борбордук стадиондо өткөн футбол оюндары 4 күнгө созулуп, жыйынтыгында финалдык оюнда «Абдыш-Ата» «УФБны» (Улуттук Футбол Борбору) 3:0 эсебинде жеңип чыкты. Үчүнчү орунга болгон беттешүүдө «Талас-1» командасы 0:1 деген эсеп менен жеңишти «Таразга» уттуруп жиберди.

Жеңүүчүлөргө кубок, медаль жана грамоталар ыйгарылды.

Кошумчалай кетүүчү нерсе, бул турнир 6-ирет өттү. Эми ушундай масштабтагы турнир 2010-жылдын 24-30-мартта Байконурда өтөөрүн стадиондун директору Бекен Осмоналиев билдирди. (Сыргак Раимканов)

Таласта Кыргыз Республикасынын көз карандысыз күнүнө даярдык болуп жатат

“Talasnews“, 18-август, Талас.“Быйылкы жылы мамлекетибиздин көз карандысыз майрамын жогорку деңгээлде өткөрүүгө аракет кылып жатабыз, ошого карата даярдыктар жүрүп жатат. Өткөн жылдардан айырмачылыгы - аскер комиссарияты, өрт коопсуздугу, облустук ички иштер тармагынын кызматкерлери, спортчулар, медициналык орто окуу жайынын студенттеринин катышуусунда парад болот”, - деди Талас шаардык маданият бөлүмүнүн орун басары Нуржан Кыштобаев.

Ошондой эле майрамдын астындагы массовкада таластын бийчилери жана атайын аскер бөлүктөрүнүн кызматкерлери өз өнөрлөрүн таартуулашмакчы. (Жеңишгүл Тоголокова)

“Мээрим-Булагындагы” балдарды ачкачылык күтүүдө

“Issyk-kulpress”, 18-август, Каракол. Түп районундагы Ак-Булуң айылындагы “Мээрим-Булагы” балдар үйүндө жаңы көйгөйлөр: азык -түлүктөр түгөнүп бара жатат. Жакын арада балдарды тамактандырууга болбойт. Эл аралык донордук уюмдар, жеке ишкерлер өзүлөрүнүн ресурстары менен балдардын тамактануу көйгөйүнө жардам берип келген. 2009-жылы көп соттук иштерден улам балдар үйүнүн жетекчилиги гранттык жардамга билдирме бергенге үлгүрбөй калган. Бүгүнкү күндө 47 бала үч уйдун сүтү жана өзүлөрүнүн огородундагы жашылчалар менен тамактанууда.

Балдар үйүнүн директорунун орун басары Айнура Осмонованын айтуусунда Ысык-Көл областынын башчысы Кыдыкбек Исаевдын атына кайрымдуулук марафонун өткөрүүгө жардам берүүсүнө кат даярдаган.

Жакынкы күндө балдарга Григорьевка айылындагы аскер бөлүгүнүн аялдар комитетинен жардам келет. (Салтанат Мурзабаева)

Нарын Мамлекеттик Универстетинде окууну каалагандардын саны өсүүдө

“Аймак-news”, 17-август, Нарын. Нарын Мамлекеттик Универстетинде окууну каалагандардын өсүшү татыктуу билим берүү, окуу процессин оптималдаштыруу, ички тартипти бекемдөө, материалдык-техникалык базаны чыңдоо боюнча иш аракеттердин үзүрү дешет окуу жайдын өкүлдөрү.

Быйыл Нарын Мамлекеттик Универстетке (НМУ) тапшыргандар саны былтыркыга салыштырмалуу 30%га өскөн. Жогорку окуу жайдын кабыл алуу комиссиясынын жоопту катчысы Кубан Дүйшекеевдин билдирүүсүндө, күндүзгү окуу бөлүмүнө бюджеттик формада окуу үчүн Билим берүү министирлиги бөлгөн 165 орун бүгүнкү күндө толук ээленди. Ал эми контрактык формада окуу үчүн ар бир адистикке 25 орун каралган болсо, учурда айрым адистиктер боюнча алар толуп, педагогикалык багыттагы адистиктер боюнча гана 5тен 10го чейин абитуренттер тапшырып толбой турат.

«Демек университетте студенттерге татыктуу билим берүү, окуу процессин оптималдаштыруу, ички тартипти бекемдөө, материалдык-техникалык базаны чыңдоо боюнча журүп жаткан иш чаралар өз жемишин берип жатат», - дейт К. Дүйшекеев. (Токтосун Шамбетов)

Тоң райондук гезиттин нускасы 2,5 миңге жетти

“Аймак-news”, 17-август, Каракол. Тоң районунун мамлекеттик администрациясынын жардамы райондук гезиттин мезгилдүүлүгүн жана нускасын көтөрүүгө жардам берди.

Акыркы жылдары Тоң районунун “Эмгекчил” гезити айына эки жолу 600 нуска менен чыгып келсе, бүгүнкү күндө ал жума сайын 2,5 миң нуска менен чыга баштады. Гезиттин башкы редактору Мээркан Токсобаеванын айтымында, буга райондук мамлекеттин администрациянын жардамы өбөлгө болгон. “Райондук гезитибиздин нускасын көбөйтпөсөк, айылда эмне болуп жатканын кайдан билебиз деп, жазылууну көбөйтүштү. Ошондой эле компьютерибиз жарактан чыгып калгандыктан, бир компьютер жана фото аппарат алдык”, - дейт М. Токсобаева.

Эскерте кетсек, райондук “Эмгекчил” гезити 1941-жылдын 1-декабрында “Кызыл Күнчыгыш” деген ат менен негизделген. 1963-жылы Тоң району менен Жети-Өгүз району бириккенде “Коммунизм таңы” деген ат менен чыккан. Андан кийин райондор кайра бөлүнгөндө “Эмгекчил” деген атка ээ болгон.

Гезит 2005-жылдан бери Каракол шаарындагы “Дархан” өндүрүштүк басмаканалык жоопкерчилиги чектелген коомунун фирмасында офсеттик ыкма менен басылып чыгууда. Учурда редакцияда бир редактор жана бир кабарчы эмгектенет. (Эльназ Жусуева)

“Чыгыш-Чыгыш: чексиз өнөктүк” программасы Таласта

“Talasnews“, 17-август, Талас. 14-августта Талас Медиа Борборунда «Сорос-Кыргызстан» фондунун “Чыгыш-Чыгыш: чексиз өнөктүк” программасынын координатору Манас Токтомбаев уюмдун кызматкерлери менен жолугушту.

Жолугушуу учурунда программанын максаты тууралуу сөз болуп, кандай долбоорлорду колдоорун, кайсы багытта иш алып бараарын жана Талас Медиа Борбору менен келечектеги иш пландары талкууланды.

Манас Токтомбаев: «Таластык өнөктөштөр менен жолугушуумдун максаты, биздин программанын убактылуу токтогондугуна байланыштуу кайра аны жандандырып, ошондой эле жаны өнөктөштөрдү тартуу» - деди.

Эки кундук иш сапарында Талас областынын бир катар жарандык уюмдары менен жолугушуулар болмокчу. (Салтанат Досмамбетова)

Кыргызстан Мусулмандарынын Азирети муфтийи Мураталы ажы Жуманов: «РАМАЗАН АЙЫ, ЫНТЫМАК МЕНЕН ЫРЫСКЫНЫ НАСИП КЫЛСЫН»

августа 17, 2009 от kmb3 and tagged Дин, Коом

“Баткен таңы”, 17-август, Баткен. Кечээ (13.08.2009-ж. ред.) Баткен жергесине Кыргызстан мусулмандарынын Азирети муфтийи Мураталы ажы Жуманов иш сапары менен келди.

Ал Баткен шаарындагы диний багыттагы окуу жайы медресенин ачылуу аземине катышты. Ошондой эле аземге Казакстандан, Түркменистандан, Бүткүл Дүйнөлүк Жаштар Ассамблеясынан келген өкүлдөр, Баткен облусунун губернаторунун биринчи орун басары А.Мадалиев, Баткен шаарынын мэри С.Эрматов, Баткен облусунун казысы Султаналы ажы Гапуров, мечиттин иамамдары жана айыл аксакалдары катышышты.

Аземди облустун казысы Султаналы ажы Гапуров ачып, сөздү Кыргызстан Мусулмандарынын Азирети муфтийи Мураталы ажы Жумановго берди:

- Бисмиллахир-рахмаанир-рахиим! Алхамду лиллаахи роббил ааламин!

Урматтуу мусулмандар!

Урматтуу аталар, инилер, апалар, эжелер жана бүгүнкү аземге келген коноктор! Баарыңыздарды Аллах Таалага кулчулук болуп турган илим үйүнүн ачылышы менен куттуктаймын! Аттуу-баштуу аалымдар, устаздар көпчүлүгү ушул Баткен жергесинен чыгышкан. Учурда ислам илимин чочубастан ушундай илим үйлөрүндө билим ала турган учур келди. Бул медресенин курулушуна себепчи болуп, бизге Президентибиз, Өкмөт мүчөлөрү, Баткенди шарты катаал, алыскы аймак деп жакшы көңүл бурушту. Өткөн жылы пайдубалын түптөп кеткен болсок, мына быйыл анын ачылуу аземинде олтурабыз. Медресе ачылды, бирок, аны ишке берип пайдаланып алуунун өзү чоң машакат. Эми бул медресе сиздерге аманат. Бул жерде сиздер сапаттуу диний илим алышыңыздар керек. Мына алдыда ыйык Рамазан айы келе жатат. Кудайдын ушундай ыйык күндөрүндө мен сиздер менен жолугуп олтурганыма абдан кубанычтамын. Баарыңыздарды чын ыкласымдан ыйык Рамазан айы менен куттуктаймын. Рамазан-рахматтын, магфираттын (күнөөлөрдүн кечириши) жана тозоктон кутулуунун айы.

Алла Таала Рамазан айында пенделерден урушкандарды болсо жарашууну, орозо кармап кайрымдуулук иштерди жасоону, сооптуу амалдарды аткарууну талап кылат. Алла Таала Мухаммад алейхис-саламдын үммөтөөрүн, Курандын жана Рамазандын нуру менен сыйлаган. Бул нурларга ээ болгондорду кабырдын жана Кыямат күнүнүн караңгылыктарынан сактайт. Жараткан өзү ыйык айдын урматында мусулмандарга, өлкөбүзгө ынтымак, ыйман менен жакшылыкты насип кылсын, - деди Мураталы ажы Жуманов өз сөзүндө.

Андан соң, губернатордун орун басары А.Мадалиев, шаардын мэри С.Эрматов, облустун казысы Султаналы ажы сөз сүйлөп келген конокторго, аталган окуу жайынын бүткөрүлүшүнө салым кошкондорго ыраазычылыктарын билдиришти.

Бул диний багыттагы окуу жай, Кыргызстандагы онунчу медресе болуп саналат. Аны куруу идеясын 1992-жылы Баткендеги дин кызматчылары пландаштырышкан.

Медресенин курулушу үчүн демөөрчү болуп Бүткүл Дүйнөлүк Жаштар Ассамблеясынын Президенти Саид Баеми имараттын курулушунун 70%, жергиликтүү калк 30 пайызын каржылашып, облуста марафон өткөрүлүп, элдик ашар ыкма менен бүткөрүлдү. Бул окуу жайын жалпы суммасы 3 млн. сомдук, 8 класстык каана, 2 мугалимдердин каанасынан турган 150гө жакын окуучу билим-тарбия алганга ылайыкташтырылган.

Эң негизгиси Баткен облусунун эли үчүн руханий дүйнөнү тазартып, дин тутуунун туура жолдорун үйрөнүүгө кеңири шарт түзүлдү. Белгилей кетүүчү жагдай, Кыргызстан боюнча 2000 ден ашуун мечит болсо, алардын ичинен 248 мечит жана 9 медресе Баткен облусунда орун алган.

Иш сапарынын соңунда Мураталы ажы Жуманов кудайдын куттуу күндөрүндө дагы бир жакшы саамалык, Баткен шаарынын мэри С.Эрматовдун жеке өзүнүн каражатына Аэропорт кварталына курган Сейдакмат уулу Мирболот атындагы жаңы мечиттин ачылышына катышты. Ушундай жоомарттык менен, элге кызмат кылган атуулдардын көбүөйүшүнө тилектештигин билдирди.

Гүлчехра Тажибаева, «Баткен таны», № 36, 14.08.09

Нарындын жаш лидерлери атайын окуудан өтөт

“Аймак-news”, 17-август, Нарын. Нарын облусунун 25 жаш лидери 10 күндүк «Жаш лидерлердин мектеби-2009» аттуу атайын окуу семинарынан өтмөкчү.

17-августтан 27-августка чейин Нарын шаарында «Жаш лидерлердин мектеби-2009» өз ишин алып бармакчы. Облустан жана шаардан атайын сынактын негизинде тандап алынган 25 жаш лидерлер үчүн адам укуктары, экономика, маданият, коом тууралуу тренингдер өткөрүлүп, жергиликтүү жаш депутаттар, жаш ишкерлер менен жолугушуулар уюштурулмакчы. “Мектептин негизги максаты - өлкөбүздүн чыныгы атуулун даярдоо менен коомдун өнүгүшүнө салым кошууга жана келечекке жаңы идеяларды түзүүгө мүмкүнчүлүк түзүү”, - деп айтылат «Нарындын Жаш лидерлери» коомдук бирикмесинин пресс-релизинде.

Бул долбоорду Кыргызстандагы ЮСАИД уюмунун жардамы менен «Нарындын Жаш лидерлери» коомдук бирикмеси «Жарандык эдвокаси реформа жана стабилдүүлүккө» программасынын аткаруучусу “ПАКТ инк” уюму менен биргеликте ишке ашырууда. (Токтосун Шамбетов)

Облуста 508 баңги катталган

“Акыйкат”, 17-август, Жалал-Абад. Жалал-Абаддагы психикалык саламаттык борборунда баөги заттарды пайдалануучу 508 киши катталды.

Аталган борбордун башкы врачы Баратали Жантөрөвдин айтымында, бардык катталгандардын 163ү баөги заттарды ийне аркылуу колдонушат. Анан да баөги затына көз карандылардын арасында 14 аял бар, а калганы эркектер, деп билдиришет психикалык саламаттык борборунан.

Сабира Калыкова

Кочкораталык мугалимдерди ким коргойт? же облустук прокуратуранын дагы бир принципиалдуулугу

“Акыйкат”, 17-август, Жалал-Абад. Жалал-Абал облустук прокуратурасы Кочкор-Ата шаарындагы И.М.Губкин атындагы №14-орто мектептин жетекчилигинин үстүнөн Кылмыш-Жаза Кодексинин 171-статьясынын 2-бөлүгүнүн 2-пункту, 3-бөлүгүнүн 3-пункту, 350-статьясынын 1-бөлүгү менен кылмыш ишин козгоду. Мектеп жетекчилигине 82 миң сом акча каражатын мыйзамсыз пайдаланган деген кине коюлууда.

Ошондой эле, Ноокен райондук билим берүү бөлүмүнүн башчысы Орозбай Шеровдун, ошол эле бөлүмдүн кесиптик кошунунун жетекчиси Абдурахим Айдаровдун, бөлүмдүн адиси Заирбек Үсөновдун үстүнөн берилген кайрылууну өз убагында карабаганы үчүн Кыргыз Республикасынын «Административдик жоопкерчилик жөнүндө» Кодексинин 62-статьясына ылайык административдик өндүрүш ишин козгоп, ишти Ноокен райондук сотуна өткөрүп берди.

Аталган мектептин мугалимдери мына ушул чараларга карабастан жакында эле Кыргыз Республикасынын Президенти Курманбек Бакиевге, облустун жетекчиси Кошбай Масировго, бир катар жалпыга маалымдоо каражаттарына дагы бир жолу кайрылуу жасаганга мажбур болушту.

Алардын арызы боюнча алсак, мугалимдер мектеп директорунун үстүнөн арыздангандан кийин райондук билим берүү бөлүмү аны өз убагында карабай, тескерисинче, мектеп жетекчилиги жана райондук билим берүү бөлүмүнүн кызматкерлери мугалимдерди коркутканга аракет жасашкан. Ошондой эле мугалимдер Жалал-Абаддагы «Справедливость» укук коргоо уюмунун айрым кызматкерлери бул талаш-тартышка улуттук өң берип жатышканын айтышып, мындай адилетсиздиктерден карапайым мугалимдерди коргоого алууну суранышкан.

Арыздарда мугалимдер мектеп жетекчилигинин мугалимдерге карата жасаган одоно жана маданиятсыз мамилесин, акча каражаттарына мыйзамсыз мамиле жасаганын, 20 мугалим ишин таштап кетүүгө мажбур болгонун, дагы да көптөгөн кемчиликтерди жазышкан. Мындай терс көрүнүштөрдү четтетүүнү, мектепте нормалдуу тартип орнотуп берүүнү өтүнүшкөн.

Албетте, жогорку бийлик органдары бул арыздар боюнча чара көрүшөрүнө шек кылууга болбойт. Себеби, азыркы бийликтин негизги максаты - элге кызмат кылуу, билим берүүдө реформа жүргүзүү жана мыйзамдуулукту орнотуу. Ал эми облустук прокуратура карапайым мугалимдердин арызын карап, дароо текшерүү жүргүзүп, кемчиликтерди аныктаган соң мыйзамдык тартипте кылмыш ишин козгогон жана административдик өндүрүш ишин козгоп, ишти сотко өткөргөн. Мунун өзү бизде мыйзамдуулук жакшы көзөмөлдө турганын, прокуратура органдары иштеп жатышканын, ал эми мугалимдердин муңу, арызы каралбай кала бербестигин көрсөтүп турат.

Айтаар нерсе, дал ошол мугалимдердин кызыкчылыктары менен түздөн-түз иштеген райондук билим берүү бөлүмү, кесиптик кошун өз милдеттерин так аткарбай, мыйзамдардын нормаларын бузганы - өтө өкүнүчтүү көрүнүш. Ал эми укук коргоо уюмунун позициясы болсо…

Ошентип, жаңы окуу жылынын башталганына аз калганда Кочкор-Атада жаңжал чыкты. Анын аягы эмне болуп бүтөрүн турмуш көрсөтөт. Бирок, «Акыйкат» гезити бул жаңжалдын аки-чүкүсүн жакшылап билүү жана окурмандарга жеткирүү үчүн журналисттик иликтөө жүргүзмөк болду.

Жалил Сапаров

«Курманбек» каналы курулуп жатат

“Акыйкат”, 17-август, Жалал-Абад. Сузак районунун Курманбек айыл округунун аймагында «Курманбек» каналынын курулушу башталды. Азыр Көк-Арт суусунун аркы өйүзүнөн берки өйүзүнө сууну түтүктөр менен алып өтүү үчүн даярдык иштери жүргүзүлүп жатат. Бул тууралуу «Автожол» жабык акционердик коомунун генералдык директору Жигиталы Исмаилов билдирди.

Бул курулуштун буюртмачысы Айыл жана суу чарба министрлигинин тийиштүү департаменти болуп саналат жана 2008-жылы бул курулушка тендер өткөргөн. Ага катышкандар арасында «Автожол» акционердик коому 138 миллион сомдук долбоору менен тендерди жеңип алган.

-Биз курулушту толук жүргүзбөйбүз, себеби, ал үч бөлүктөн турат. Биринчи бөлүгү сууну Кызыл-Суудан Тамга-Терекке, Көк-Арт суусуна чейин алып келүү, үчүнчү бөлүгү эгин талаасына канал куруу жана Багыш айыл округунун Октябрь айылына чейин суу жеткирүү иштери. А биз экинчи бөлүгүн - сууну кош түтүк менен Көк-Арт суусунан алып өтүүнү ишке ашырабыз, - дейт Ж. Исмаилов.

Азыркы кезде түтүк жатчу жерлерди даярдоо жана башка иштер менен 15 жумушчу, 2 эксковатор, 2 бульдозер, 1 автокран иштеп жатат. Диаметри 1 метр келген бир түтүк аркылуу суу дайрадан өткөрүлүп, дагы бир диаметри 1,5 метрлик түтүк менен суу айрым авариялык абал түзүлгөндө дайрага түшүрүлөт.

-Буюрса, биздин долбоор 2010-жылдын аягына чейин бүткөрүлөт, - дейт Ж. Исмаилов.

Алынган маалыматтарга караганда, «Курманбек» каналын куруу 2001-жылы алгачкы жолу долбоорлонуп, жалпы наркы 1 миллиард сомду түзгөн. Бирок, ал кезде өлкөнү башкарган «лаборанттар» мындай акчаны таба алышмак эмес. Курулуштун эмки жаңы наркы 3 миллиард сомго жетип барат, дешет адистер.

Бирок, азыркы бийликтин мындай ири курулуштарга чамасы келип турган учур. Демек, курулуш сөзсүз аягына чыгарылат.

Айжамал Кадырбаева