Каракол шаарынын энциклопедиясы даярдала баштады

«Аймак-news», 17-июль, Каракол. Жакында Каракол шаарынын 140 жылдык мааракесине карата энциклопедия чыкмак болду.

Басууга даярдалып жаткан энциклопедияда Каракол шаарынын карт тарыхы, шаардын эң мыкты адамдарынын эмгеги, басып өткөн жолу камтылмакчы. Бул жөнүндө «Дархан» фирмасынын директору Төлөн Бекбаев басма сөз кызматкерлерине маалымдады. Анын айтымында, энциклопедия 500 нускада жарык көрүп, сатыкка коюлат.

Мындай иштин үстүндө шаардын көрүнүктүү инсандары: география илимдеринин кандидаты Ш.Токомбаев, филология илиминин кандидаты Ш.Шакитов, журналист Т.Бекбаев жана журналист Б. Байсеитовалар эмгектенип жатышат. Энциклопедия даяр болгон учурда мэрдин көзөмөлүнүн астында ар тармактын өкүлдөрүнөн комиссия түзүлүп, энциклопедия текшерүүдөн өтөт. (Сайкал Аттокурова)

Таластык журналисттерге маалымат китепчеси тартууланды

«Talasnews.KG», 17-июль, Талас. 16-июлда Талас Медиа Борборунда жергиликтүү журналисттерге шайлоо процессинин жүрүшү тууралуу брифинг өткөрүлдү. Иш чаранын жүрүшүндө ар бир журналистке IFESтин адистери тарабынан иштелип чыгып, Бишкектеги ОБСЕ борборунун колдоосу менен жарык көргөн «Журналисттин чөнтөк дептери» тартууланган.

Иш чаранын негизги максаты болуп атайын журналисттер үчүн түзүлгөн маалымат китепчесин презентация кылып, таратуу болуп эсептелген. Брифингди Талас Медиа Борборунун директору Гульбара Иманкулова өткөрүп, чөнтөк китепче тууралуу айтып берди. «Шайлоо учурунда журналисттерге жардам боло турган мындай форматтагы китепче Кыргызстанда биринчи жолу чыгарылды», - деди Гүлбара Иманкулова.

Чөнтөк китепченин көлөму кичине болгону менен ичинде шайлоо учурунда керектеле турган бир топ маалымат бар. Кыргыз жана орус тилдеринде болгондуктан шаардык да, элеттик да журналист колдоно алат.

Иш чарага катышкан журналисттер китепчени барактап, чөнтөктөрүнө да салып көрүштү. «Эң керектүү маалыматтар бар экен, ишибизди женилдеткени үчүн Бишкектеги ОБСЕ борборуна рахмат», - деди катышуучулардын бири, «Талас турмушу» гезитинин башкы редактору Козубек Иманкулов. (Фархат Тилекматов)

Нарын ОИИБ облустук СПИД борборунун маалыматтары менен макул эмес

«Naryn.KG», 17-июль, Нарын. Нарын облустук СПИДке каршы күрөшүү борборунун “Кочкор райондук ички иштер бөлүмү жүргүзгөн рейддин убагында акы алып секс кызматын көрсөткөндөр, наркомандар табылган эмес жана ВИЧ/инфекциясын жуктуруп алган бир туугандар экөө тең наркомандар болгондугу ички иштер кызматкерлеринин наркомандарды табуудагы иштеринин жетишсиз болгондугун далилдейт”, - деп социалдык мааниге ээ жана өзгөчө коркунучтуу оорулар боюнча өткөн координациялык кеңеште айтылган маалыматы менен Нарын облустук ички иштер башкармалыгы макул эместигин 16-июлда “Naryn.kg” сайтына билдирди.

Алардын маалыматы боюнча 2009-жылдын алты айында Кочкор РИИБге бейбаштык кылып жана коомдук жайда мас абалында 467 адам түшкөн. Бул боюнча райондук СПИД борборуна бир нече жолу билдирүү берилгенине карабастан келип текшерүүдөн өткөргөн эмес. “Мындан сырткары РИИБнын убактылуу кармоочу жайында такай камакта отурган 37 адамдан бир да келип СПИДке каршы анализ алынган эмес”, - дейт Нарын ОИИБнын маалыматында.

Нарын шаарында астма-клуб ачылды

Аймак-news, 17-июль, Нарын. Көкүрөк оорулуулар областтык борбордо дарыланганга мүмкүнчүлүк алышты.

16-июлда Нарын шаарынын облустук үй-бүлөлүк медицина борборуна Кыргыззстандын көкүрөк оорулар коому астма-клуб ачты. Нарын облустук үй-бүлөлүк медицина борборунун жетекчиси Кыял Мамбеталиевдин айтымында, анын максаты - астма жана өпкөнүн өнөкөт оорулары менен ооругандарды каттоого алып, аларга акысыз кеңеш берүү, ал эми дарыгерлерге бул ооруну айыктыруунун ыкмаларын окутуу. Андан тышкары, мындай оорулар менен жабыркагандар бул клубдан дары-дармек жана башка жардам да алып турушмакчы. Бул иш-чарага Москвадан Көкүрөк оорулар боюнча илим изилдөө институтунун профессору Сергей Бабак жана республикабыздагы көкүрөк оорулар коомунун башчысы Талант Соронбаев катышты. (Токтосун Шамбетов)

Мүмкүнчүлүгү чектелген балдар «Барчын» лагеринде эс алууда

Аймак-news, 17-июль, Талас. Талас районундагы «Барчын» лагеринде 6-июлдан баштап райондун ар кайсы айылдарынан келген мүмкүнчүлүгү чектелген 81 бала жана аларды караган ата-энелери, бир туугандары эс алышууда. Балдардын жайкы эс алуусун «Адонай» коомдук фонду камсыздап жатат.

Талас районунун акиминин орун басары Азият Жаркыналиеванын демилгеси менен балдарга кайрымдуулук акциясы уюштурулду. Анда тубаса оорукчал, мүмкүнчүлүгү чектелген балдарга “EveryChild” уюму 3500 сом өлчөмүндө ар бир балага оюнчук, «Айкөл» атуулдук демилгелерди колдоо борбору 70 даана балмуздак, Талас райондук мамлекеттик администрациясы таттуу азыктарды балдарга белек кылышты.

Кайрымдуулук акциясынын жүрүшүндө Талас райондук балдарга билим берүү борборунун бийчилери, «Жаштар» демилгелүү тобунун спейс-бийчилери балдарга чакан концерт беришти.

Лагерге 2 небереси менен Карасуу айлынан келген Гүласал Сыдыкова: «Ушинтип оорукчан балдарга көңүл буруп, оюнчук, таттуу тамактарды алып берип жаткан коомдук уюмдарга, кайрымдуулук акциясын уюштурган Азият Жаркыналиевага ыраазычылык билдирем», - деди. Ушунча баланы карап, кошо келген ата-энелерин, бир туугандарын багып жаткан «Адонай» коомдук бирикмесине ата-энелердин, балдардын атынан алкыш айтылып, «ой-максатыңарга жеткиле» деп ак бата тиленди. (Салтанат Досмамбетова)

Кара-Буура районунун Үч-Булак айылында спорт зал ачылды

«Talasnews.KG», 15-июль, Талас. Кара - Буура районунун Кара-Буура айыл округуна каршатуу Үч-Булак айылында спорт зал ишке берилип губернатордун катышуусунда ачылышы болду.

Бул иш чарага Кара - Буура айыл округунун бюджетинен 180 миң сом акча каражаты бөлүнүп берилген, андан тышкары АРИСтин жардамы менен 1 миллион 200 миң сом бөлүнүп берилип спорт зал ишке берилди.

Үстүбүздөгү жылдын 14 - июлда спорт залдын ачылуу аземине Талас областынын губернатору Бейшенбек Болотбеков, Кыргыз Республикасынын Өкмөтүнө караштуу дене тарбия жана спорт агенттигинин статс-катчысы Нуржан Бердинованын катышуусунда өттү.

Ачылуу аземинде «дени сак улут гүлдөгөн өлкө» ураанынын алдында Республикалык мелдеште талас облусунун курама командасы 1- орунду камсыз кылышына зор салымын кошкондугу үчүн областтын спорт комитеттеринин кызматкерлери жана машыктыруучулары талас облустук мамлекеттик администрациянын ардак грамотасы жана мактоо баракчалары менен сыйланышты - деди губернатордун басма сөз катчысы Бакай Садыров. (Фархат Тилекматов)

Ак-Суу жана Түп райондорунда кичи ГЭС жана биогаздык түзүлмөлөр орнотулат

«Issyk-Kulpress.KG», 15-июль, Каракол. Ушул жылдын февраль айынан тартып Ысык-Көл областынын Түп жана Ак-Суу райондорунда Европалык комиссиянын Кыргызстанда кичи ГЭСтерди жана биогаздык технологияларды өнүктүрүү долбоору иштей баштады. Долбоордун алкагында мындай ресурстарды кичи ГЭСтердин курулушуна колдонуу боюнча окутуучу семинарлар өткөрүлдү.

Бул долбоор туурасында “Журналист үйү” коомдук бирикмесинин пресс-борборунда долбоордун түштүк Дания университетинен келген өкүлдөрү Свен Соммер, Кнуд Кристенсен, долбоордун биоэнергетика боюнча адиси Алексей Веденев жана жергиликтүү өкүл Руслан Тюпеевдин катышуусу менен өттү.

“Долбоор бир гана Ысык-Көл областында жүргүзүлбөстөн, бардык Кыргызстандын аймактарында да жүргүзүлөт. Бирок, кичи ГЭС жана биогаздык технологиялар Ысык-Көл областынын Ак-Суу жана Түп райондорунда орнотулат. Ысык-Көл областын тандап алганы бекер эмес. Анткени, кичи ГЭСтерди жана биогаздык түзүлмөлөрдү курууга суулары көп жана шарттары жакшы”, - дейт жергиликтүү өкүл Руслан Тюпеев.

Мындай долбоорду жергиликтүү тургундар да колдоп, кичи ГЭСтерди куруп бериши үчүн 20 жакын арыз жана биогаздык түзүлүштү орнотуп берүүгө 30 арыз түшкөн. Бул долбоор 1,5 жылга созулат.

“Мындай технологиялар Данияда көп жылдан бери иштетилип келет, эми долбоор бүткөндөн кийин дагы Кыргызстанда кичи ГЭСтерди жана биогаздык технологиялар боюнча түзүлмөлөрдү орнотуу улантылышы керек “, - деп билдирди Дания университетинен келген өкүл Свен Соммер. (Мээрим Усубакунова)

Нарын облус аймагында эки суткада 3 табыгый кесепет катталды

«Naryn.KG», 15-июль, Нарын. 15- июлда түнкү саат 2:30 чамасында Нарын шаарынын Алма-Бак аймагынын тушунан таштар кулап, натыйжада Бүбүсара Бейшеналиева көчөсүндөгү үч үйдүн короо-жайларын талкалап кеткен.

Тилекке жараша тургундар жашап турган тамдарга тоодон кулаган таштар жеткен эмес. Өзгөчө кырдаалдар министрлигинин Нарын шаардык бөлүмүнүн кызматкери Мелис Алымбаев бүгүнкү күнү алгачкы иликтөөлөр жүрүп жаткандыгын, негизинен ошол туштагы 12-13 үй көчүрүлүүгө кириптер экендигин билдирди.

Ал эми 13- июль күнү Бишкек-Торугарт унаа жолунун 351-чакырым аралыгындагы Кызыл-Бел ашуусуна жакын тушунан 400 метр аралык жол, жаандын кесепетинен кум, шагыл, ылайга толуп, автоунаалар каттамы эки жарым сааттай токтоп калган. Ат-Башы айылынын үч көчөсүнөн 50гө жакын үйдүн алдынан суулар көтөрүлүп чыккандыгы аныкталган. Мындай маалыматтарды облустук өзгөчө кырдаалдар башкармалыгынын жетекчиси Болот Аманбаев билдирди. (Күмөндөр Усуптегин)

Нарында жаш лидерлердин жайкы мектеби ачылды

«Аймак-news», 15-июль, Нарын. 7-июлда Нарын шаарында жаш лидерлердин жайкы мектеби ачылды.

«Жергиликтүү жаш лидерлердин мектеби 2009» долбоорунун алкагында жайкы мектеп уюштурулуп, ага катышууга облус боюнча 25 студент жана окуучулар тандалып алынган.

«Нарындын жаш лидерлери» коомдук бирикмесинин жетекчиси Нурбек Өмүрзаковдун айтымында, аталган долбоордун максаты - жайкы окуу мектебинин катышуучуларына семинар-тренингдерди өтүү аркылуу алардын билим деңгээлин өркүндөтүп, өлкөбүздүн чыныгы атуулдарын тарбиялоо.

Аталган долбоор «Сорос-Кыргызстан» фондунун каржылоосу менен ишке ашып, окууну жергиликтүү жана чет өлкөлүк тренер-волонтерлор өткөрүп жатышат. (Эркингүл Бокоева)

Караколго убактылуу жумушчулар керек

«Аймак-news», 15-июль, Каракол. Көл башында жогорку билимдүүлөр эмес, жумушчу кесиптегилер көбүрөөк талап кылынууда.

Каракол-Ак-Суу регион аралык миграция жана жумуштуулук комитетине жумуш издөө максатында ар кандай суроолор менен кайрылгандар 2008-жылы 2179 түзсө, 2009-жылы алардын саны 2400 кишиге б.а (112%) арбыган.

Кайрылгандардын ичинен так жумуш издегендердин саны 974 болсо, расмий түрдө катталгандардын саны 898 кишини түзгөн. Алардын ичинен 167 вакансия боюнча орношкон. Коомдук убактылуу иштерде 236 киши иштейт.

Аталган комитеттин директору Шарика Жусупованын айтуусу боюнча, жумушсуздардын санын азайтуу максатында комитет ширетүүчү, жыгач уста, чач тарач жана башка кесипте 3 айлык курстарда 42 кишини окуткан. Жумушсуздук комитетинин кызматкери Гүлай Дүйшеева белгилеп кеткендей, «юристтер менен мугалимдерге талап жок, көбүнчө ширетүүчү, жыгач уста, пол жуугуч, официант,слесарь, сантехниктер талап кылынат».

Айта кетчү нерсе - миграция жана жумуштуулук комитети Ысык-Көл областынын Ак-Суу районунда, Каракол, Балыкчы шаарларында Ысык-Көл, Түп, Жети-Өгүз, Тоң райондорунда жүргүзгөн мониторинг боюнча 400 ашык вакансия бар экени далилденген. Анализдин жыйынтыгы боюнча көбүнчө окууну талап кылбаган адистерге муктаждык бар.

Шарика Жусупова учурда Ысык-Көл областы боюнча мугалимдерге 188, доктурлар үчүн 21, андан тышкары 2 инженер жана ден-соолукту чындоо курортуна 64 вакансиялык орун бар экендигин билдирди.

Ушундан улам Караколго жогорку билимдүүлөр көп зарыл эместей көрүнөт. (Гүлзана Адыкеева)

Нарындык журналисттер шайлоону чагылдыруунун оош-кыйыштары менен таанышып чыгышты

«Аймак-news», 14-июль, Нарын. 14-июлда Нарын шаарында өткөн брифингде шайлоо учурундагы журналисттердин укуктарын жана милдеттерин Нарын медиа борборунун жетекчиси Жаркын Ибраева түшүндүрдү.

Бул иш чарага жергиликтүү ЖМКнын өкүлдөрү катышып, өздөрү кызыккан суроолорду беришти. «Брифингдин максаты – журналисттер өз укуктарын, милдеттерин билип, элге шайлоонун жүрүшүн сапаттуу чагылдырышы», - деди өз сөзүндө Жаркын Ибраева.

Андан тышкары, журналисттерге ЕККУнун колдоосу менен иштелип чыккан чөнтөк китепче таратылды. Ал китепчеде шайлоонун жүрүшүн чагылдырган журналисттер туш келе турган суроолорго кыска-нуска жооптор берилген. (Токтосун Шамбетов)

Кочкор районунда мугалимдер Курманбек Бакиевге милдеттүү үгүттөөчүгө айландырылууда

“Аймак-news”, “Naryn.kg”, 13-июль. Мындай маалыматты Кочкор районундагы Туз айылында жашайм, ысымымды азырынча айта албайм деген шайлоочу телефон аркылуу билдирди.

Анын айтымында райондогу Чолпон айыл округунун башчысы Качыке Бейшебаев мугалимдерди Курманбек Бакиевди үгүттөөгө милдеттендирип, Бакиевге аз пайыз добуш берсек, биз уят болобуз, мен кызматтан кетем, Туз айылы таза суу программасына кирбей калат деп жыйналыш жасаган. Ошондой эле купуя шайлоочунун айтымында Туз, Оро-Башы, Ара-Көл айылдарында мугалимдер 15ке чейинки шайлоочулардын паспорт даректерин каттоого алууда. Чолпон айыл округ башчысы Качыке Бейшебаев мындай маалыматты жалган деп санайт. «Тескерисинче, Туз айылынын чыкпай калган суусун район акими чыгарып берди. Биз болгону 15тен мугалимдерди Кочкор айылындагы Бакиевдин жолугушуусуна алып бардык”, -дейт Качыке Бейшебаев. (Күмөндөр Усуптегин)

Таласка таштандыларды чогултуучу контейнерлер келди

«Аймак-news», 13-июль, Талас. «Таза шаар үчүн» долбоорунун негизинде ЕККУнун каржылоосу менен июль айынын башында Таласка таштандыларды чогултуучу 90 контейнер келди.

Шаардын көчөлөрүндө атайын таштанды чогултуучу контейнерлер кээ бир жерлерде гана болгондуктан таштандылар ар кайсы жерлерге ташталып келген. Ал эми эки жылдан бери «Таза шаар үчүн» долбоорун «Жылдыз Транзит» коомдук фонду ЕККУнун каржылоосу менен ишке ашырууда.

«Былтыр таштандылар үчүн кичине урналар гана орнотулса, быйыл чон контейнерлер орнотулат. Бүгүнтөн баштап контейнерлерди ар бир мекеменин алдына жайгаштырабыз», - деди «Жылдыз Транзит» коомдук фондунун аткаруучу директору Тургун Момунбекова.

Ар бир мекеме өзүнүн жанына жайгашкан контейнерлер үчүн жооп керчилик алмакчы. Кошумчалай кетсек, буга чейин мэрия таштанды чогултуучу 20дай контейнерди көп кабаттуу үйлөргө койдурган. (Женишгул Тоголокова)