“Аймак-news”, 24-август, Каракол. Учурунда атагы алыска кеткен Ак-Суу районунун “Боз Салкын” элдик ыр-бий ансамбли азыр экинчи жолу төрөлүп, тушоо кесүү концертин берди.
Союз жылдарында алыскы өлкөлөргө чейин таанылып, кыргыз маданиятын даңктап, кийинки убакта тарап отуруп, аты калып, өзү жоголуп кеткен “Боз -Салкын” элдик ыр-бий ансамбли калыбына келтирилди. Раймамадминистрациянын демилгеси жана колдоосу менен эл арасындагы таланттар менен ансамбль кайра толукталып, жаңы кийимдер тиктирилип, заманбап аппаратура алынып жаңыдан экинчи жолу жаралды.
Ысык-Көл облусунун 70-жылдык мааракесине жана Эгемендүүлүк күнүнүн алдында кош майрамы менен куттуктаган “Боз-Салкын” ансамбли облустун элине ыйык рамазан айынын биринчи күнү, тагыраак айтканда 21 августта Караколдогу К.Жантөшев атындагы драма театрында бет ачар концертин тартуулады.
“Жаратыш кыйын, ал эми кыйраганды кайра оңдоп жаратыш андан да кыйын. Ошол кыйынчылыктарды жеңип, элдик таланттарды , кылымдар бою мурас болуп келе жаткан маданиятыбызды алып чыгып жандандырган Ак-Суу районунун башчысы Б.Купешевге баштапкы жана азыркы “Боз-Салкындын” жаратуучусу З.О.Камбаровага терең ыраазыбыз, - деди Кыргыз Республикасынын эмгек сиңирген артисти, К.Жантөшев атындагы драма театрынын директору Марат Алышпаев. -Ансамблдин жаңы мууну да мурдагыдай деңгээлде бутуна туруп, чет өлкөлөргө чейин кыргыз маданиятын таанытып, намысыбызды колго алган, кылымдарга жашап уламышка айланган ансамблдардан болооруна тилектешмин жана ишенем”.
Кошумчалай кетүүчү нерсе, бул концерт учурунда облмамадминистрациянын маданият жана жаштар саясаты бөлүмүнүн башчысы А.Бейшенова ансамблдин жаш артисти Б.Сагынбаевага “Маданияттын мыкты кызматкери” деген наамды тапшырды. (Жаныгүл Мамакеева)
Сообщения
Комментариев нет:
Отправить комментарий